قصيدة "ميسَّة" للشاعرة والزجالة المغربية الأستاذة خديجة لحرار.

* ميسَّة *

* طمعت غير فالي شاط

بعدما لعبوا الروندا 

و دارو ميسة فالتكشاط

* خربقوا الرموز 

و تخلطت الارقام فالماط

* المعادلات شدها بزلوم 

حدرت الرأس و تواطات

* زيادة فالاسعار

الناقص فالصندوق والابار

الضرب فالجيوب 

بنهار و بلا سمسار

القسمة بينهم 

و انت والله لا دقتيه 

و خا تكون 

من الأهل و الجار

* مشكل هاذا 

مشكل و مشكووول

* سولت قطعة الشكل

و مالك كتقطعينا تقاطع

قطاع الطرق و تجبري 

احاسيسنا بالترقاع

و بجميع حروف النداء 

ناديتها و رميت عليها العار

خبري الخبر بخبرنا

مال الحال 

كثر فيه النصب و الاحتيال

خبري الخبر يخبرنا

مال الفاعل مرفوع 

وفبحر الظلمات 

يغرق الأبطال

خبري الخبر يخبرنا

مال الجار و المجرور 

كسر نسور و عمر لقبور

فوق سما و فوق لبحور

طيارة و بابور

و فوق الارض 

حديد بقوة النمور

و الراحة ف افخم ديور

خبري الخبر يخبرنا

مال شبه الجملة  

قرصت بقريص النحلة 

و بجريد النخلة 

ساست كتاف 

صبح همها 

واضح يتشاف

خبري الخبر يخبرنا

مال حروف العطف

ما عطفت 

ما ساعدت 

ما حنت 

و خا غير بصرخة 

وااااااااااا الضمير 

فين غابر

 و علاش ضاسر

و مع من سهران

حي و ميت مبنج

تسلب و تامر

ما همك 

جيعان و لا عطشان 

ولا صرخة خرجت 

من جوف عامر

ياك الضمير 

مرة ضاهر 

و مرة مستور 

تحث ضس من رخام و غابر

خاصك نغزة من مجهول 

يخرجك من سبات 

بابو حديد مطرق بمسامر

ياك المبني للمجهول 

تعفس ترفس بحال الغول

على الاقل

عمي الغول كان حنين 

يزورنا فالاحلام

و فاليقضة 

بالنخوة و بلا شماتة 

يلبسنا سلهام

خديجة لحرار.

المغرب.

طَهَّرْتْ الْمَا / قصيدة زجلية / الشاعر المغربي الزجال أحمد ناجم.

 

[ طَهَّرْتْ الْمَا ]

قصيدة زجلية

الشاعر المغربي الأستاذ أحمد ناجم 

بَاشْ نْطَهَّرْ الْمَا

گَلْتْ لِيهْ 

شُوفْ طْوَيَّرْ فَ السّْمَا

شَافْ

وْطَوَّلْ الشُّوفَة بَزَّافْ 

شَافْ طْيُورْ شَلاَّ طَايْرَة 

وَ دْوَابّْ سَايْرَة

وَ عْقُولْ حَايْرَة

مَنْ حَالْ لْحَالْ

حَالْ زَالْ

وْ حَالْ زَادْ حْمَا 

شَافْ شِي زَهْرُو طَالَعْ

وْشِي طَاحَتْ لِيهْ السُّومَة 

شَافْ نَجْمَة 

وَشْمَة عْلَى خَدْ هْلاَلْ

وْ تَمْرَة / جَمْرَة

فْ يَدْ أَطْفَالْ

وَ ضْبَابْ بْلاَ بِيهْ

مَا يْكُونْ سْحَابْ

مَا يْجُودْ الشَّلاَّلْ

شَافْ الْحَرْفْ الضَّاوِي

طَيُّو ذْهَبْ

وَ كْلاَمْ مْسَرَّبْ لاَوِي 

مَا يَعْجَبْ

مَا سَاوِي مَثْقَال

رِيحْ شَتْوِيَّة هَبَّتْ

صَبَّتْ شْحَالْ 

وَانَا

بْنُقْطَة بْنُقْطَة 

رَبِّيتْ الْمَا

طَهَّرْتُو

زَدْتْ رْوِيتْ الْكَلْمَة

وَ بْلِيگَةْ صُوفْ

دْهَنْتْ وْجَهْ السّْمَا 

أحمد ناجم

المغرب

 

محطات في رحلة حرف شارد / عبد الرحمن بوطيب / مجلة الرؤى العربية للإبداع والنقد / مجموعة تأصيل قصيدة النثر الحداثية.

 

 

عبد الرحمن بوطيب مؤسس مجلة الرؤى العربية للإبداع والنقد، ومؤسس مجموعة تأصيل قصيدة النثر الحداثية.