كلمة من مداد الحسرة / زجلية / الشاعر والزجال والناقد الأستاذ حسن العلوي مفهوم / المغرب.
كلمة من مداد الحسرة ...
من الجوف الݣادي
الزاهر نيران
خرج صوتي جغمة جمرة
كتبتو بحروف
على الواح العصيان
كلمة تسيل مدادها حسرة
ف زمان الجور
و خسران الميزان
زمان احفر و وسع الحفرة
كلشي فيه
غادي بلعكسان
الحق وكح و الباطل جرى
الطمع اصبح
ذيب ب نيبان
ياكل و لا تشبعو بݣرة
كي بحر ملهوط
ما رواتو ويدان
و لا شبعات كرشو قطرة
هذا يجري
وراها لهتان
و تݣول قارصو فك النعرة
عجاجو نايض
ريݣو طيحان
فراݣة الدنيا مشرباه جعرة
يجمع يحش
ف غلايل الجنان
و لا يخلي منها تمرة
لاخر مسكين
معݣول السيقان
ما ݣد ينوض مثقل حݣرة
ياكل جغديد
مرفوس بلحزان
يشرب الهم ف اقداح القهرة
يخدم يدمر
و جبينو عرݣان
يعطي للناعس و يطلب السترة
ما يݣول عييت
من حلاس الشقيان
و لا مليت من نغيز الدبرة
قانع راضي
عريان و جيعان
و على فتات العيش يبوس الݣدرة
هذا زماني
دفنتو بدون كفان
و قريت عليه اسوار الجفرة
زمان بنادم
غادي عميان
هاز القنديل ف مجمع البصرا
يمتى ينهض
من سبات الشتيان
يرجع نوار جميل النظرة
الزين ف لعروس
ماهو ب فستان
و لحداݣة ما هي بهضرة
خد الحكمة
من ناس زمان
من با لعسل يصبر للعݣرة
اعمار الرجال
ما هي ب العيمان
هي ب لعمال شانها يمرى
من زرع يحصد
سبولو تمران
من جد ينجح وخا يكون حجرة
و للي فاني
منݣوض الدرعان
وخا يبات يحفر ما يغرس بدرة
حسن العلوي مفهوم
مراكش ( مارس 2020 )
تطيب الحروف الندية النابضة... حسرة.
ردحذف