ادْكّات الشوفة / زجلية / الشاعر والناقد والزجال الأستاذ رحال الإدريسي / المغرب.
ادّكًَّات الشوفة ف جوفي
و العين مني ليا تشوف
بين عقل تخمامي و حمقي
تقب جوفي و لي بعدو الشوف
ديك الشوفة و لحمال ل عنقي
المعنى و الحلمة بين الرجا و الخوف
قصيت جبال حادة الشوفة وراها
لبصر عماه غبار الحال لمكفوف
و ناديت ب على صوتي و صداه
رد الصوت حجر الصم من لكهوف
انا المشعار و الليل ليكََة اسمق
نديرني على طول السوايع صوف
من الدزة المرسومة على جلدي
أنا المدزوز واكََف حربيل منتوف
على شعري رصّات زوّاقة مَ مواتية
الضحك على كََاعة كلها هتوف
الضحك على حصيدة مرعوضة
تخلطها غيسها بشعيرها يطوف
انبت شعير مادّْ يدُّو للحنة مازوزي
لعجينة فطيرة و الدكََيكََ ملفوف
ياك يا شوفة مدكََوكة و الصك عبدلاوي
من دهبو القلب نار هاد الجوف
عيني عليك حاطة العين سارحاك
و بياض العين لّْكحال سيوف
نقطع السكََية من كرش الباطل
و بعين الحق الضاوية نشوف
ياك يا عين قلبي النابضة حياتي
حسبت الغمزات والفلتات سفوف
من ضيك يا كََلبي شافت عينك
ما دوّاه خاطري و لملاجّة ألوف
هزّيت من متقال الليل شوفة
و عييت نقطع لحدودة أووووف
أوووف على ما هزّات لشفار
الحاجب غطى الغمزة منتوف.
داب كحالك ف بياض كََلبك
و تخلّط صفي صخرك ب رّْهوف
الكََلب شكى و بكى قاصد مغاسل
الضرب حرّك لمواجع هرّس المشقوف
كيف يجبر الحال و حالو شاتي
تبكي سماه ترطَّب تراب الجوف
نعنّكََ ليام الفالتة مني غبينة
و نبكى على جنب الليل صروف
لكََرام نتقّل به دمعي نكمد جمري
و نديرني دربالة و قفّال ترعة الخوف
نسدّْ على باب منّو جاني برد حالي
نسدّ على عمري لمحبّس موقوف
نديرني زمّارة ف يد صبيان حومة
نسمع نايي و اللحن حزين مرخوف
نكََلع الشنقة لمشنّْقاني المقبوضة
ترخف النفس يطيح زهر ملقوف
ياك أدّكََّات الشوفة ف غركََ جوفي
و العين منّي ليا عيات اتشوف
ياك بين عقل تخمامي كل خوفي
على تقّاب جوفي ولي بعدو الشوف
هادا كََلبي ملي شاف كفي و كفوفي
كنت كاس جاج لداخل و برّا شوف
قريت كاسي مرايا و لمرايا عكسات
عكسات...
ضو خاطري روات شوف و جوف
و ف كََصعة صكََعة كان الميلاد
و كان داك العايش و داك المخطوف
يا سامع شوفي و جوفي روى المعنى
من صهد بركان طافح جمر و حروف.
الإدريسي رحال.
المغرب: 21/8/8.
تعليقات
إرسال تعليق